Tertia cura sit in rebus eleganter cogitandis, §§~115, 177. Veritas, M. §~515. sed Aesthetica, §~22. i.e. veritas, quatenus sensitive cognoscenda est. Veritatem obiectorum metaphysicam novimus convenientiam eorundem cum universalibus maxime principiis, M. §~92. et inde Leibnitium intelligimus, qui Theodicaeae T. II. p. m. 312: Potest, inquit, dici aliqua ratione principium contradictionis et rationis sufficientis inclusum definitioni veri et falsi. Nam repraesentatio veri in aliquo obiecto metaphysici, quatenus intra animam certi subiecti peragitur, est ea convenientia repraesentationum cum obiectis, quam plerique veritatem logicam nominant, alii mentalem, afficientiae, correspondentiae et conformitatis, dum metaphysicam veritatem materialem appellant.