Hinc comparatio adscendens commemorato toto vel superiori lubentissime suam facit occasionem ex hoc toto vel universali descendendi denuo in quasdam compartes subiecti comparationis et alia congenera, vel conspecies, §. 745. quoniam sic totum et genus magis in concreto sistitur, §. 752. Abstractis suis quantuliscunque l. c. Virgilius statim subnectit determinatiora, quibuscum, ut ita dicam, possint intra mentem in vividius quoddam concrescere:
<p>Nonne vides, croceos ut Tmolus odores,</p>
<p>India mittat ebur, molles sua thura Sabaei,</p>
<p>At Chalybes nudi ferrum, virosaque Pontus</p>
<p>Castorea, Eliadum palmas Epiros equarum?</p>