Neque quaerimus in pulcre cogitaturo quovis virum probata sic pietate gravem ac meritis venerabilem, ut vel solo nutu silentium tumultuantibus imponere valeat, multo minus hominem qui fronte gravi tristique supercilio suas opiniones aliis contumaciter obtrudat, minime omnium unum ex iis, qui ignava nequeunt gravitate moveri.
Nobis sufficit animus absolute magnorum, adeoque dignorum etiam, et potens et constanter avidus, seduloque cauturus, quae iam reprehendit Lucilius, Dum ridet versus Enni gravitate minores.