Dignitatem aestheticam, §~182, et absolutam et relativam, §~185, et obiectivam et subiectivam, quatenus in ea deprehenduntur n.~1 et 3, §~182, liceat in sequentibus negativam, quatenus autem simul n.~2 et 4 §~c. considerantur, positivam appellare. Et quoniam nobilem iam ethos aesthetici partem aggredimur, definiam illud, psychologis saltim perspicue, generatim ante omnia per studium possibilitatis moralis, M.~§~723, aestheticum, vel in aestheticis observatum. Ethos nomine, ut ego quidem sentio, caret sermo romanus. Mores appellantur - Sed ipsam rei naturam spectanti mihi non tam mores significari videntur, quam morum quaedam proprietas. Quint. VI.~3.