Exemplorum exempla maiora sint omnes primo fabulae, §. 526. Aeneis splendide declarat:
<p>tot volvere casus</p>
<p>Insignem pietate virum, tot adire labores.</p>
Pluribus Ilias exemplis illustrat illud:
Si quid delirant reges, plectuntur Achivi.
Lucretius Veneris imperium declarat exemplis primo satis generalibus:
<p>Per te quoniam genus omne animantum</p>
<p>Concipitur, visitque exortum lumina solis.</p>
<p>Aeriae primum volucres te, diva, tuumque</p>
<p>Significant initum perculsae corda tua vi.</p>
<p>Inde ferae pecudes persultant pabula laeta,</p>
<p>Et rapidos tranant amnes. Ita capta lepore</p>
<p>Illecebrisque tuis omnis natura animantum</p>
<p>Te sequitur cupide, quo quamque inducere pergis.</p>
Neque tamen acquiescere prius potuisse videatur, quam donec exemplis imperium Veneris illustrando descendit usque ad singularem personam, et suppositum Mavortis:
<p>in gremium qui saepe tuum se</p>
<p>Reiicit aeterno devinctus vulnere amoris,</p>
<p>Atque ita suspiciens tereti cervice reposta</p>
<p>Pascit amore avidos inhians in te, dea, visus,</p> e. c.
v. 38.