Quoniam nova antiquis, loco propiora remotioribus notiora exemplis supponi generatim possunt, M. §. 512. caetera si sint paria, praeferantur antiquis recentia, peregrinis patria, et spectatori, quem inprimis optas, domestica. §. 757. Dialogus de oratoribus, quem alii Tacito, Quintiliano quidam tribuunt, 8. Lubentius, ait, novis et recentibus, quam remotis ac oblitteratis exemplis utor. Quae ita sunt antiqua, simul ut obsoleta, oblitterata, vel usu longo trita et antiquata videri possint, pulcre postponuntur ita novis, ut simul habeant, quo iustum novitatis studium excitare queant, ac alere. §. 741. Virgilius laudes vitae rusticae illustraturus exemplis non graeca petit, nec Asiam, nec Aegyptum, sed romanis potissimum scribens patrias antiquitates consulit, Georg. II. 532:
<p>Hanc olim veteres vitam coluere Sabini,</p>
<p>Hanc Remus et frater. Sic fortis Hetruria crevit,</p>
<p>Scilicet, et rerum facta est pulcerrima Roma,</p>
<p>Septemque una sibi muro circumdedit arces.</p>
<p>Aureus hanc vitam in terris Saturnus agebat.</p>